放眼世界～瑞典(1)

            放眼世界～瑞典(1)

北歐對好多人尼講，都係好陌生，

今次無問準你地，我情商咗住係瑞典嘅家姐，

帶大家到瑞典嘅大街小巷逛一逛(唔埋你地想唔想去)

，務求令大家多D認識，了解多D當地嘅生活文化

 好多謝家姐一口就答應我嘅請求，

日後就麻煩妳去到邊就影到邊啦，咁我就可以不定時咁放D相入網誌度同各位網友分享喇！

 話個秘密俾大家知

：我家姐係整嘢食高手黎嫁！(有相為証)

 佢嘜都識整嫁！

 

 唔阻大家啦！

睇相先啦！

 

 

 

 

 

 

 

 

 

 

 

 

衷心祝福

                      衷心祝福

  早前，表小姐嘅媽咪發現甲狀腺生咗2粒嘢，幸好抽細胞化驗後屬良性瘤，無大礙！真係鬆一口氣

 因為驚住日後會惡化，咁就選擇做個切除手術，日子定咗明天30/11，我衷心祝福佢手術順順利利，平平安安， 唔使擔心表小姐嫁，我會好好照顧佢，妳就安心養傷啦！

冬日煲仔菜～羊腩煲

                      冬日煲仔菜～  羊腩煲

  

早前見開心媽咪整羊腩煲，比佢挑起我條根，尋日見有D時間，就買咗羊腩番黎，再加埋D醬料和配料，

咁就整咗煲大大煲嘅羊腩煲，不過一餐就食清光啦！

今次我專登加多D水去炆，炆好後用個爐〝座〞住，咁就可以一邊食一邊加生菜，好有打邊爐feel呀！

萬眾期待之薑醋

             萬眾期待之薑醋

  大家係咪好想知煲薑醋嘅情況尼？

 雖然上星期因為老爺嘅關係，攪到好忙，無晒時侯，但係為咗妳地，我一於用盡全力為大家服務，唔會令大家失望嘅

遲就遲咗大約1星期先煲，不過我會煲密D，追番D時間

星期日買咗10斤薑，我刮薑都刮咗2小時，由8：30pm 開始刮到10：30pm，真係手都軟晒！

 

  

 然後風乾1晚，取出拍扁，再用白鑊爆香同埋烘乾，然後放入煲內，

  

 跟住倒D甜醋入煲內，醋要浸過畺再多DD，開中火煲至醋滚，再轉小火煲２小時，熄火。

   

跟住隔日攞出黎煲滚，每次滾起再煲20分鐘以上，咁就得啦！

     

 

咕嚕魚尾

                               咕嚕魚尾

  

  上星期，老爺突如其來嘅假期，攪到我由朝忙到晚，唔係煲湯就係煮飯，煩死人啦！

 尼個餸係用咗鯇魚尾煮成嘅，本來條魚尾係諗住用黎滚湯嫁，不過最後比我擺咗佢上枱啦！

 材料：鯇魚尾1條(洗淨抹乾，用少少鹽醃一陣)，罐頭細菠蘿1罐(切粒)，番茄1個(洗淨切粒)，洋葱半個(洗淨切粒)，葱1條(切段)，葱１片，蒜蓉少許

 調味：白醋，糖，茄醬，生抽，老抽，生粉，水(全部伴勻)

 製法：1﹒熱鑊落油(多些)，先爆香薑片，再將魚撲上生粉，放入油中用小火煎至兩面香脆熟透，OK就〝畢〞上碟

            2﹒ 熱鑊落油，爆香蒜蓉，再落洋葱，番茄煮透，落埋菠蘿兜勻，再加入調味煮滾，加入葱段，熄火！再將咕嚕料淋在魚上，OK！完成啦！

 仲有！仲有！煲咗個鴛鴦番薯糖水

 真係夠晒sweet呀！

  

 今次用咗有少少紫色嘅白番薯，同埋黄心番薯黎煲

  

 

淮山黨參煲山班魚湯

             淮山黨參煲山班魚湯

 

          見 老爺整親隻手指，要聯7針咁多，作為屋企CEO嘅我，可以為佢做嘅嘢只有1樣，就係煲番D湯水比佢補一補

        尼個湯係系老爺整親第二日煲嘅，一早走去街市買咗1斤山班魚(有3條)，好似係32元，番屋企煲足3小時，夠晒火候啦！老爺話好甜好好飲喎！

        尼個湯好有益，一家大細都啱飲，平時可以多D煲黎飲嫁！

   黨 參～ 補 中 益 氣

   淮 山 ～補 脾 養 胃 補 腎

   山 斑 魚～滋 陰 

  配 合 來 煲 湯 可以 強身健體 ， 增 強 抵 抗 力

  小朋友 飲 用 更 可 以補 充 體 力 ， 讀 書 都 更 加 醒 目 D

 材料：黨參1両(洗淨切段)，淮山1両(洗淨)，紅棗約10粒(洗淨去核)，陳皮1角(浸軟刮囊)，瘦肉15元(洗淨切粒，然後出出水)，山班魚1斤(魚檔代劏，番黎洗淨抹乾兩面略煎)，水適量

 

製法：凍水放入陳皮一齊煲滾，再將其他材料全部放入煲內，水滚起後轉細火煲3小時，飲前落鹽調味，OK！攪掂啦！

       

 

做死人咩

                              做死人咩

            尼幾日真係超忙呀！無晒時間去拜訪各位blog友，自己都唔好意思！

        其中一個原因係表小姐今個星期要考試，每日10點10分就放學，放咗學又要陪佢食下嘢，温下習。以往温習唔使咁耐嫁！今年好多嘢温呀，我越温越忟，越温越想發脾氣添，到夜晚有D時間啦！對住部腦又眼訓喎，最後叠埋心水入房〝校校豬〞，唉！又一日啦！今個星期每日就係咁過，真係悶死人啦！我而家出到成身都係菇啦！好彩！今日係last day，終於甩難啦！好嘢！

        另一個原因係老爺星期一系公司整親隻手指，佢話流咗好多血呀！即刻走咗去急証室度睇，嘩！要〝聯針〞呀！仲要7針咁多添！

        佢個日神咁早就番咗屋企，估到有D嘢啦！點知佢話整親隻手指，醫生仲寫咗1個星期病假比佢，真係比佢嚇鬼死呀！

       老爺嘅傷口唔可以濕水，即係尼幾日就奉旨休息啦，我就要做阿四！買餸煮飯，拖地洗碗，洗衫摺衫……做死人咩！希望佢早D好番啦！唔係我就攰死嫁啦！

 

馬灣公園‧南丫島一天遊

           馬灣公園‧南丫島一天遊

            星期 日天色灰灰暗暗，真係好驚會落雨，好彩天公造美，成個旅程都無落雨，到回程返屋企先至開始落咋！

       今次係跟屋苑去旅行，地點係去馬灣公園&南丫島，再遊埋船河，食埋海鮮。尼次有好多人參加呀！大約有400人，分咗7部旅遊車

         朝早7點45分係屋苑集合，8點30分準時乘旅遊巴出發，9點正就由青衣碼頭轉乘專船去馬灣

       你地睇！就系尼架船，好多人呀！全船爆滿

        沿途所見都係灰矇矇，好彩就係無落雨，間中仲見到少少陽光添！

        不過系架船上面，越坐越凍，D風吹過黎，真係有D〝滕滕震〞

 

  

            黎到馬灣公園啦！嘩！好多人呀！可能係禮拜啦！

  公園好乾淨好新呀！

  

         之後就坐船去咗南丫島，吃午飯，行街，參觀，我買咗砵仔糕食呀！味道好得呀！

  各位， 你地今次有幸啦！可以見到老爺同埋大少嘅背影呀！

  

  回程途中玩Bingo，不過20個得獎者，無我份呢！

 

  以為今次無運行啦！點知佢話有抽獎喎！好嘢！又有得玩

 好彩好彩！攞番個尾彩，獎品系出前一丁1 pack！

 

芋頭扣肉

                                  芋頭扣肉

  

           天氣開始轉冷，又係時侯要食D高熱量嘅食物啦！

        今日係街市見到D芋頭好靚，見大少鍾意食，同埋佢又肯幫表小姐温習，減輕我嘅工作量，咁我就唔嫌麻煩，整咗個芋頭扣肉過佢食。

         大少，係咪好好食尼

         大家睇唔睇到D腩肉呀，簡直係入口即溶，而芋頭就好淋，好入味呀！

    

 

土伏苓牛大力煲豬骨湯

             土伏苓牛大力煲豬骨湯

 

  大埔真係好喇！你想買嘜就有嘜，從來唔使驚會無得買，就好似我今日煲尼個湯咁，要買新鮮土伏苓同埋牛大力，只要一行入街市，就有幾檔任你揀，真係太方便啦！

 用土伏苓牛大力黎煲湯，好有益嫁！大家不仿試試啦！

 土伏苓是有效的抗氧化劑，可去濕解毒

  牛大力功能清熱潤肺，止咳，強筋活絡

 你買咗，檔主會幫你切片，返屋企沖沖水就煲得架啦！

 

 材料：新鮮土伏苓 ＋ 牛大力 ＋ 馬蹄  共25元 (洗淨)，果皮1角(浸軟刮囊)，蜜棗4粒，豬尾骨20元(先出水)，水適量

 製法：水煲滚，放入全部材料，煲滚後小火煲3小時，飲前落鹽調味，OK！攪掂啦！

 

大埔逍遙遊截止報名啦！

         大埔逍遙遊截止報名啦！

 多謝各位blog友嘅支持！

經過1星期嘅召集，已經有13人報咗名啦，連埋我同表小姐，就有15人會出席！

12月12日嘅行程安排，集合地點，同埋時間，我會在11月尾再同大家詳細說明

＊各位blog友記住帶個樽黎裝薑醋呀！

一不離二‧開心blog聚

             一不離二‧開心blog聚

    11月8日星期日，約咗幾位blog友出黎聚一聚，

 今次blog聚出席包括有：HoneyB，蚊蚊，潔沁，仲有緊係我啦！

 隨咗HoneyB，蚊蚊同埋潔沁係我第一次見，佢地好nice，好有親切感呀！

 佢地約好咗去科學園逛逛兼影相，我都好想去嫁

，最慘就係我唔得閒啦！要留係屋企陪表小姐温習，無計啦！只好夜晚join埋佢地一齊食飯啦！

佢地真係好喇！行完入大埔同我食飯，仲要佢地先去揾位，真係唔該晒！ 

今次去咗大埔明星酒樓打邊爐，我地烚下傾下，好快就過咗兩個幾鐘啦！

 

 今日我都無時間出街買禮物送俾佢地，只係煲咗D蔗水比佢地清清熱氣咋！希望妳地鍾意啦！

 

  食飽飽之後！HoneyB就俾佢地係科學園攞嘅禮物比我，佢地話排完再排，仲要唔怕瘀先攞到嫁，唔該晒！

 

  潔沁就帶咗佢去韓國買嘅手信送俾我地，多謝晒呀！

 

 

下次blog聚— 大埔逍遙游，期望妳地都能出席！