新攪作之葱油餅(附加食譜)

             新攪作之葱油餅(附加食譜)

   各位唔好意思，最初諗住懶D咪唔寫食譜囉，點知大家都係同道中人，一樣咁鍾意食葱油餅，我而家寫番啦！ 

   

        葱油餅尼樣小食食就食得多啦！不過一路以黎都無時間去揾食譜(籍口多多，懶就懶啦)，平日要帶表小姐返學，一早就要起身，今日就唔同，起身仲掛緊8號風球，即係話唔使起身住，可以舒服多陣先啦！真係好更好嘅係，陳太打黎話今日唔使我過去幫佢煮飯呀，即係今日day off 啦！好嘢

         咁多時閒真係要揾D攪作先得，唔係實悶死我(唉！辛苦命)，諗咗一輪就決定整葱油餅，因為全家上下都鍾意食，今日我情商表小姐幫手，不過佢就越幫越忙姐 (預咗)  ，煎好嘅葱油餅唔使10分鐘就無哂啦，大少話好好食喎！問我做嘜整咁少，我話試下整咋，廢事整得唔好無人吼呀！佢就話我整就驚姐，妳點會有問題呀！哈哈～多謝大少咁睇得起我，見你咁識講嘢，下次就整多D俾你食啦！  

    份量：4塊

 材料：中筋麵粉200克，沸水100克，冷水60克，葱3棵(切幼粒)，菜油或植物油(約1 /４杯)，鹽約3茶匙(4塊份量，末必用晒)

  製法：麵粉放入盆中，拌入沸水，用筷子快速攪拌成雪花狀，再加入冷水混合搓成蓋上保鮮紙，等大約10分鐘取出然後分成4等份，每個再擀成大薄圓麵皮， 然後將油(抹滿整張麵皮)，平均灑上幼鹽，最後加入葱花，再捲成腸粉狀，用保鮮紙蓋好，等多10分鐘，麵糰取出擀成薄餅，備用

     

   熱鑊落油，煎到兩面上色，然後加１湯匙水，蓋回鍋蓋，煎至無水聲，開蓋，再加少少油，煎至兩面金黃即成 ，食得啦！