新挑戰
大少細個嘅時候，可能自己入世末深啦！做嘜都驚驚青青，真係無咗老爺唔得果隻，但係近幾年唔知點解，信心強咗好多，唔理三七‧二十一，做咗先講，
義工小組、探訪、中心攪活動、學校圖書管理員、故事姨姨、學校參觀帶隊、老人中心煮下午茶、學校禁毒宣傳、家務助理課程、廚藝班、電腦課程、表演服飾加工、就連幼稚園畢業禮會場佈置都做埋，自己都覺得自己比以前有用咗好多呀！
唔好講其他啦！就講番寫網誌，我最初真係一竅不通，好多謝仔仔係電腦度整咗個手把手教學(即係同步教學)，只要照住佢個 step ，我就識做喇，而家緊係唔使啦！
尋日又接到新任務，係逢星期一、二、四 下午12：50 — 1：10，為期6個星期，為讀寫有問題嘅同學協助它們中文默書，尼個新挑戰有D難度呀！不過我會盡力 嫁啦！
有嘜煮嘜
尋日表小姐放學後出咗去荃灣音樂中心學柳琴，上一堂Miss 講咗由今堂起就要上兩個鐘，返到屋企要8點呀！我同表小姐係荃灣買咗D嘢上車食，大少唔番黎食，要去學日文，但係老爺話佢會返黎食喎，點好呀唯有開個雪櫃睇睇，有D嘜東東可以煮，好嘢
尼碟就係製成品啦！素雞炒帶子
睇落係咪好得尼，其實食落仲得呀！(唔怕醜，自己讚自己，哈哈～)
煮法好簡單，一D難度都無呀！
材料：急凍帶子8粒，素雞１包(兩條)，葱小量(切粒)
調味：豆瓣醬，糖，鹽， 生粉水(後下)
製法：帶子解凍後飛水，兜起抹乾
素雞切成帶子形狀
熱鑊落油，放入素雞煎至兩面金黃色，加入帶子同埋調味，炒勻後加D生粉水和葱粒，全部兜勻就可熄火，上碟食得啦！
多鬼餘
早兩日，陳太有位內地親戚黎咗香港旅遊，順道探訪佢地，而且仲送咗1盒佢去蒙古旅遊時買既禮盒裝猴頭菇比陳太，咁陳太好好人呀！叫我攞D返去煲
大家睇下，點解要將D猴頭菇壓到好似火柴盒咁細呀！成隻咪幾好囉，攪邊科呀！
我睇來睇去，究竟煲湯要落幾多盒嫁！竟然無講到，唔好理啦！浸1包試下先算
浸好後
原來都有幾隻嫁，不過就細隻D，最後我用咗2盒去煲湯
我同大少講，點解要壓縮姐，多鬼餘啦！１隻隻咪仲靚，使唔使攪咁多嘢呀！
大少答得好好呀，佢話唔整D卓頭嘢，點吸引D遊客買呀！仲有最主要嘅係D商人將D次D嘅猴頭菇混埋一齊壓縮，鬼知呀！唉～唔怪得D人成日講『無奸不成商』啦！
今次我買咗1 pack 急凍鮮花膠一齊煲，又幾好飲喎！
猴頭菇雪耳煲花膠湯
猴頭菇性平、味甘、助消化、利五臟、對消化不良、神經衰弱、胃潰瘍有良好的功效。
花膠含豐富蛋白質、膠質、磷質及鈣質，是固本培元、補氣活血、增精強腎、美容護膚， 無論男女老少均適宜食用，是補而不燥之佳品。
材料：猴頭菇2盒(浸軟，過水後揸乾)，豬25元(洗淨後出水)，急凍鮮花膠1 pack(解凍後，出水)，雪耳1両(浸軟後去蒂，出水)，蜜棗4粒
製法：水適量煲滚，加入猴頭菇，豬，蜜棗，水再滚起後轉小火煲2小時，跟住放埋花膠，雪耳再煲多半小時，落鹽調味，熄火飲得啦！
人生觀
有D朋友見到我，成日都話我要照顧表小姐，又要返工，唔攰嫁咩！唔好做啦！
我想講既係，各人既人生觀都唔同呀！你地想做少奶奶，咪做囉！比著我，我會覺得好悶囉，好浪費時間。叫我日日去飲茶打牌，我會死嫁！最重要既係我從來無講過比你地聽我有問題喎！做嘜幫我操心呀！
表小姐由佢BB時就由我一手照顧，到而加咁大個叫我突然放手，我唔放心囉！(你地就想啦！你估我唔知你地諗嘜呀！)
返工有時係就係會有D攰，但係從中得到既滿足感，信心，再加上僱主既信賴，同埋認同，係錢都買唔到嘅，我諗你地永遠都唔會明白嫁啦！(你地只係想揾個老公唔使做)
多謝 各位 blog 友聽我『申』，我而加寫完舒服晒啦！身邊尼D三姑真係黑我憎呀！
滋潤雪梨茶
食譜重温http://hk.myblog.yahoo.com/mamasurewin/article?mid=174
今日接咗表小姐放學後就去街市買咗份雪梨(10元7個)，番黎煲雪梨茶。
我覺得皮膚開始有D乾燥啦！都係時候煲D雪梨茶黎潤一潤，打下個底，希望冬天時個人無咁乾啦！
另外尋日唔記得多謝大少，點解？因為個 blog D音樂係大少幫我整架，真系多謝晒！
花旗參雪耳煲竹絲雞湯(4人份量)
尼幾日覺得秋意重咗，喉嚨同埋鼻都有D乾，趁住今朝有一日特別假期，咁得閒就去買咗隻竹絲雞煲番個靚湯，齊齊潤番下
晏晝煲好，唔理咁多，飲番碗先，唔係碗係大碗至真呀！
材料：竹絲雞1隻(洗淨，切件，出水備用)，花旗參1両(切片)，紅棗8粒(洗淨去核)，排骨或瘦肉約10多元(洗淨出水)，雪耳適量(浸透出水備用)，水適量
製法：水煲滾後加入竹絲雞，花旗參，紅棗，排骨，先用大火煲滚，再轉小火煲2小時，之後加埋雪耳再煲半小時，然後落鹽調味，OK！熄火飲得啦！
