為妳打打氣(二)蘿蔔炆牛肋條&...

為Phoebe打氣之餘...

都要為自己打下氣先得喇!

呢兩日温到我頭又暈眼又濛添

好攰呀...........

哈哈~大家睇睇到呀...

我温到走上張床度呀...

真舒服~

Phoebe話好想食呢兩樣嘢喎~

蘿蔔炆牛肋條&淮山杞子花膠湯

好!見係妳咋...整過妳食

 

蘿蔔炆牛肋條

材料：急凍牛肋條1pack(洗淨出水)  蘿蔔1條(洗淨後去皮切角) 

蒜頭幾粒(切蓉)  葱頭1粒(切蓉)  薑數片

八角2粒  磨豉醬  柱侯醬各1湯匙  水適量

調味：冰糖約1湯匙  蠔油約1湯匙  鹽少許

製法：熱鑊落油，爆香蒜蓉葱頭薑片，再落磨豉醬柱侯醬爆透

加牛肋條兜勻，跟住落適量嘅水，八角&冰糖

煮滾後轉小火炆大約1小時15分鐘左右

落埋蘿蔔，蠔油...炆多10分鐘左右熄火

等到食之前煮滾，將牛肋條剪粒...開大少少火收汁...再落鹽調味

OK!食得啦~

 

淮山杞子玉竹花膠湯

材料：淮山  杞子  元肉  玉竹  蜜棗 

 瘦肉(先洗淨出水)  小花膠(之前浸發好，係冰箱取出解凍就用得)

 

製法：淮山玉竹先浸一浸，然後放入滾水中出一出水，備用

杞子元肉蜜棗洗淨

水適量煲滾，放入全部材料(花膠除外)，水滾起後轉小火煲2小時

跟住放入花膠煲多20分鐘，落鹽調味

OK!飲得~