湯之選

                         湯之選

       成日都有煲湯，但係就無係blog寫低，今日就盡情咁post出黎同大家分享

          扁豆雞腳煲冬瓜湯

 

材料：冬瓜2斤，扁豆3両，排骨頭20元，雞脚6隻，蜜棗3粒

製法：冬瓜洗淨連皮切大件，扁豆浸半小時，排骨頭、雞腳分別出水，蜜棗洗淨

            水適量煲滚，加入全部材料，大滚後轉小火煲2小時，落鹽調味，飲得！

 

         椰子雪耳煲排骨湯

         

材料：椰子1個，排骨25元，雪耳1/2両，薑2片

製法：椰子開殼後倒出椰水備用(可叫檔主代勞)，然後把椰子肉去皮切粗條

            排骨出水

            雪耳浸軟去蒂備用

            水適量煲滚，落椰子肉、排骨、薑煲2小時再落雪耳和椰水再煲半小時，落鹽調味，熄火飲得！

        

         青紅蘿蔔眉豆花生煲咸豬手湯

         

材料：青、紅蘿蔔各1條，花生、眉豆各2両，咸豬手1隻，蜜棗3粒，陳皮1角

製法：青、紅蘿蔔洗淨切件，

             花生、眉豆洗淨用水浸透

            咸豬手出水、蜜棗洗淨、陳皮浸軟刮囊

            水適量煲滚，將全部材料用小火煲2又1/2 小時，試味(淡落鹽)飲得！

           

             

光陰似箭

                         光陰似箭

        尼幅相係大少和他的同學係5歲既時候同遊韓國時影既，距離現在都10幾年啦！時間過得很快，但係印象還很深刻

       小女孩的媽媽是我的好友，以前時常相約去買餸兼食早餐，但因為97既問題，佢地一家移民到英國定居，往後既日子只能隔2、3年才見一次面(佢地返港)，不過小女孩就一直沒機會碰面

        早幾日接了個電話，原來係小女孩打比我，佢返咗香港(自己返港)住係姨媽家，好開心聽到佢話黎探我，今日我就出咗去車站接佢，我一望就認得佢啦！當然現在已經不是小女孩啦！美少女一名，依然係眼大大笑容滿面

 

  

    一對天真的活寶貝

 

10幾年後既今日，佢地依然咁可愛

哈哈～比我醜化咗

 

 

番茄燴獅子狗釀素雞

                           番茄燴獅子狗釀素雞

        獅子狗釀素雞係我自創既餸，加埋番茄酸酸甜甜有嘜嘢唔好食，天氣熱無胃口，尼個餸至正！

     

材料：短獅子狗魚蛋1包，素雞1/2條(長度和闊度切成與獅子狗一樣，番茄3隻(切條)

製法：將素雞釀入獅子狗內

             熱鑊落油放入釀好既獅子狗煎至熟兜起

             熱鑊再落油，放入番茄爆透，加水煮滚，落糖、茄醬、少少蠔油，再將獅子狗回鑊拌勻，熄火上碟，食得！

 

菇菇素雞炒肉絲

            菇菇素雞炒肉絲

        菇菇即係碟餸有兩種菇，一種係本菇；另一種係金菇，全部都係大少鍾意食

       最初無諗過加素雞，但係整另一碟餸用剩咗，女人本色唔浪費，咁咪加埋落黎羅，又幾配合喎，正！

      

材料：本菇1包，金菇1包，素雞1/2條(切粗條)，梅頭瘦肉10元(切絲)，蒜頭2粒(切蓉)

製法：本菇，金菇去頭洗淨

            瘦肉絲加醃料：生抽、糖、鹽、油、生粉和少許水拌勻備用

             熱鑊落油，放入瘦肉絲炒至熟，兜起，再起鑊先爆蒜蓉，再落素雞和本菇炒至透，加少少水分，滚起後落蠔油、糖、少少老抽調味，最後落埋金菇和肉絲兜勻，落鹽調味，熄火上碟！

青瓜炆豬腩肉

                        青瓜炆豬腩肉

       今日忽然好想食南乳炆豬肉，但係又驚肥喎，就自欺欺人買D瘦少少既腩肉(不過瘦極有限)，同埋用青瓜來煮，感覺上無咁〝利〞，不過食落又真係好惹味，胃口都好D

 

材料：豬腩肉半斤，青瓜1條，南乳1湯匙，蒜頭1粒(切蓉)

製法：1.豬腩肉放入凍水中加熱煲滚，用小火煮大約30分鐘，取出沖水後切件

            2.  青瓜洗淨間住去皮再切片

            3.熱鑊落油，先爆蒜蓉再落南乳，爆透後落腩肉兜勻，再落青瓜，少少老抽調色，紹洒，糖，生抽和水蓋住鑊蓋，用小火煮至青瓜略淋(太淋唔好食)，加鹽調味，如果汁太多可加少少生粉水，熄火上碟，開飯啦！

           

韭菜百合炒燒豬脾肉

                      韭菜百合炒燒豬脾肉

尼個餸既靈感來自mandy妹，我見佢好多時會煮炒什菜，我緊係要跟啦！

 

 材料：韭菜(洗淨切段)1扎，冬菇(浸軟切片)4隻，鮮百合(去爛既再分成一瓣一瓣)半包，燒豬脾肉(切薄片)約20元，蒜頭2粒切蓉

 製法：熱鑊落油，爆香蒜蓉後落冬菇，再落埋韭菜花炒勻，跟住放入豬脾肉和百合，加少少水、蠔油、糖、鹽，再用少許生粉水埋獻‧熄火食得！

冬菜蒸大眼雞

1                     冬菜蒸大眼雞

      早幾日表小姐跟埋我去街市買餸，我問佢想食嘜嘢魚，佢就話好耐無食大眼魚，叫我買比佢食，我咁好人緊係唔會say NO啦！

           

 材料：大眼雞1條，冬菜適量，葱段，薑絲

 製法：大眼雞叫魚檔唔好去皮，魚洗淨加入薑絲和冬菜，隔水蒸6—7分鐘，取出隔去水份，然後放上葱段，燒熱油後淋在魚上，再加豉油，食得！

童年回憶

                            童年回憶

       人生有幾多個十年，尼句話講得好好，比盡你都係10個，再多你都唔好恨啦！(個人認為)所以每個十年都要過得開心、充實、有意義，咁就唔會白過啦！我自己正學習中.......

       早前將童年既舊照放入blog相簿內，現在睇番覺得印象依然深刻，雖然過咗好幾個十年

       我答應過mandy妹post表小姐D相比佢睇 ，但係找相需時，睇住我細個時D相先啦！(無得選擇)

 ＊相片水準比較差，請各位忍耐！忍耐！

 

我的第一個十年

 我和哥哥在影樓影的第一張相

       

 攝於鳳溪中學

      

 坐我左面的人唔記得是誰

    

 哥哥、我和細佬

    

 

 我家唔止四個豆丁，仲有兩個姐姐，不過年紀相距太遠

    

 

 我、細佬和細細佬(白衫)←表小姐爸爸

 

 我的單人照

 

 再黎一張

 

 幼稚園畢業了

 

 現在的我

(唔使睇黃面婆一名)

真係估唔到會有人想知我現在既樣

咁啦！比張第三個10年既自畫像比你地睇睇，有着數合家照

 

各位blog友，大少將Ｑ版全家幅上咗色呀！

 

 

 

 

父親節快樂

                             父親節快樂

        祝願各位父親開開心心、健健康康，仔仔女女孝孝順順、聽聽話話......

         ＊仔仔女女記住識做啦！

                      

蝦膠釀玉子豆腐

                   蝦膠釀玉子豆腐

 

    今日天氣太熱啦！根本就無胃口食嘢，尤其是肉類，咁就整咗個易入口又比較清既餸黎食，唔錯！唔錯！

材料：玉子豆腐，蝦膠，葱1條切粒

製法：好簡單只要將玉子豆腐切件後在上面撲上生粉，再放適量蝦膠，隔水蒸8分鐘，取出後倒去水份，熱鑊煮蠔油獻(蠔油、糖、生抽、水、生粉和麻油)，煮滾後加埋葱粒，熄火淋在豆腐上面，食得！

香煎魷魚餅

                           香煎魷魚餅

 

  係街市除咗買鮫魚BB之外，仲有買咗另一BB，就係魷魚BB，死啦！做嘜今日買哂D  BB返屋企嫁，

        魷魚BB同鮫魚一樣又係$16，我買咗$10，就夠我整兩底魷魚餅啦！真係超值！

      

 魷魚餅製法好簡單，首先把魷魚洗淨後一切為二，再加入葱花、薑蓉、生抽、胡椒粉、鹽，5湯匙麵粉和2隻蛋，拌勻後備用

熱鑊落油，倒入一半粉漿，煎香一面反轉再煎另一面，搞掂上碟食得！

＃最好加埋芫茜碎，香好多嫁！

甜酸汁鮫魚

                甜酸汁鮫魚

 

      今朝係街市見到有好多扁鮫BB賣，睇落真可憐，咁細條就比人捉咗，不過好抵買又新鮮，$16有1斤，我買咗6條只係$12                    

               

製法好簡單，只要先把魚洗淨後抹乾，加入少許盬略醃，再在魚上撲上生粉，然後熱鑊落油，先放入薑片，再把魚放入，煎香一面再反轉煎另一面，煎好後〝不〞上碟，然後煮個甜酸汁淋在魚上面，OK！食得。

 

自家製漢堡扒

                         自家製漢堡扒

 

    今日下午同大少和表小姐去咗圖書館，嘩！多人到嚇死你，可以用難民營來形容，真係每個角〝咯〞都係人，總之就好亂啦！回程途中就入咗去某間茶餐廳，我就吃咗件雞批，大少和表小姐就吃蘋果批，唔錯，幾好食！

       返到屋企都6點幾，剛剛食飽都唔想煮鈑，但係記起今朝買咗免治牛肉和免治豬肉，我驚唔留得，就整咗漢堡扒黎食，個汁有落喼汁都幾開胃，又再食多半碗飯

   尼個餸之前有煮過，食譜請進

http://hk.myblog.yahoo.com/mamasurewin/article?mid=65

 

我的煮飯生涯(三)

                我的煮飯生涯(三)

      昨日陳生放假，所以唔使過去幫佢手，可以休息一天。

      今日回復正常，一早出咗去大埔墟買餸，然後上去陳太屋企，首先就幫佢煲落湯先，因為陳太昨晚話我知，有人比咗一條大節瓜佢，又唔知點處理，叫我幫手搞點佢，我就買咗扁豆，淡菜和排骨放埋一齊煲，味道應該OK！

      是日晚餐：

 淡菜扁豆節瓜排骨湯(唔計節瓜，仲有陳太有舊瘦 肉，    所 以買咗好少排骨)$20

 魷魚蒸肉餅$17

 梅菜蒸魚腩$13

 菜心$6

   共$56 

待續......

 

椰汁芒果糯米糍

                            椰汁芒果糯米糍

 

    表小姐因為甲型H1N1停課2週，連帶平曰學習的柳琴和游水都受牽連，通通都要停課，咁就死火啦！佢係屋企不停話悶呀！其實我比起佢更加悶，因為由朝到晚都要睇住佢，又唔可以同D朋友食飯傾計，都唔知會唔會直落放暑假添！係就煩啦！

            今日見表小姐咁悶，就係屋企開咗一班(親子甜品班)，表小姐最鍾意食芒果，就跟韋太個blog學整芒果糯米糍，整出黎好軟滑好好食呀！

         ＊ 表小姐第一次就成功咗，佢話好有滿足感呀！

  以下是她的傑作，雖然形狀包得唔多靚，但勝在有內涵

 

             ＊大少話同出面買既無嘜分別，好得呀！

  以下是他的傑作，比表少姐好少少啦！新手上路算唔錯

 

 材料：糯米粉 140g，粘米粉  1湯匙，吉士粉  1湯匙，糖 6湯匙 ，油 1湯匙，

椰漿(細1盒) 200g，水200g，椰絲 40g，芒果(大) 1個

  ＊份量可製成16粒

 製法可參考韋太烹飪教室

 http://irenechanwai.mysinablog.com/index.php?op=ViewArticle&articleId=112096

 

   ＊HoneyB尼罐就係吉士粉