神茶系列~羅漢果雪梨潤肺湯

             神茶系列~羅漢果雪梨潤肺湯(附食譜)

早前好朋友話我煲果D係神茶

咁即你話我係神婆姐

哈哈！諗諗下~整番個神茶系列都好喎

近期流感高峰期，好多人中招，徵狀大多數係氣管發炎，喉嚨痛，聲沙，痰多，咳嗽...

今日神婆有好介紹

就係呢個~羅漢果雪梨潤肺湯

哈哈~經臨床實驗，呢個湯係得嘅(我連續幫人煲咗2日，佢話好有效喎)

 

功效：清肺潤燥，化痰止咳；對感冒引起的喉痛聲沙, 失音, 喉嚨發炎有幫助

大家不彷試下~

羅漢果雪梨潤肺湯

材料：羅漢果1/4 個(壓碎)，南北杏2湯匙，雪梨 2 個(去心，留皮，切粒)，
蜜棗１粒，瘦肉15元(出水)

＊唔加瘦肉可用3粒無花果代替

 

製法：瘦肉與其他材料加水 2公升(約8碗)一齊用大火同煲，煲滾後改小火煲約2 小時，熄火飲得！

＊個人認為唔需要加鹽調味，因為羅漢果雪梨都有甜味，當甜湯味道唔錯嫁！

＊羅漢果份量唔可以多過1/4個，唔係就太甜，好難飲嫁！