神茶系列~ 桑寄生蓮子蛋茶(附食譜)
哈哈~今日神婆又發功啦~
煲咗個桑寄生蓮子蛋茶
材料好簡單，但係非常有益
等我話妳地知咩係桑寄生啦~
桑寄生通常寄生在桑樹、櫟樹、華樹、楊樹、柳樹、蘋果樹等樹木上嘅植物，倚靠寄生樹吸取水分和無機鹽
桑寄生蓮子蛋茶嘅益處：
桑寄生蓮子蛋茶不寒不躁，有治療風濕,，關節無力，養血安神，補腎補血，氣血不足，更有潤髮、潤膚等美顏功效，女士常飲可以養顏補身
桑寄生蓮子蛋茶(3人份量)
材料：桑寄生3/4碗，蓮子30粒，雞蛋3隻，片糖適量
製法：雞蛋煲熟去殼
蓮子洗淨後用水浸30分鍾，然後去芯
桑寄生洗淨放入魚袋
清水12碗煲滚，放入桑寄生，蓮子&雞蛋，翻滾後用中大火煲20分鐘，再轉為
小`火煲40分鍾
跟住取出桑寄生，加入片糖調味，OK！飲得~
為妳摭風擋雨~
早前學校要學生參加水試
為的只係想選能力較強嘅學生為校出賽
一向不愛爭鬥，更不愛埋堆的我~
總覺得呢D小圈子活動，
家長明爭暗鬥嘅氣氛
不適合小朋友，好唔正常
我只希望表小姐有個開心嘅童年
永遠天真可愛，傻傻更更咁，幾好呀~
從來不會讓表小姐參與呢D無謂嘅競爭
做自已想做嘅事不知幾快活~
但係今年表小姐主動要求參加
好~只要你想，我俾妳
哈哈！原來佢真的有能力~可以出線
唉~麻煩嘅事就開始啦
居然有家長眼紅，質疑表小姐嘅能力
想打表小姐主意(想攞咗佢比賽項目嘅位)
吓！使唔使咁緊張呀
我地玩下咋~
唔好影響到小朋友啦！
呢個世界幾時變成咁
好險惡呀！
真係令人怕怕~
我身為佢姑媽，表小姐唔使驚
就算發生任何事，我都會為妳摭風擋雨~
冇人可以蝦到妳嘅
好好做番妳個開心快樂嘅儍大姐啦~
冬瓜薏米煲水鴨湯(附食譜)
功效：清熱解毒、消暑祛濕
噚日藍爸爸放假
朝早陪咗我去買餸
行經吉の島，就入去超市八下啦
咦！有水鴨買喎~
水鴨呢樣嘢真係可預不可求嫁
俾我見到緊係唔放過啦！
其實都吾平嫁
細細隻盛惠34元9角
今日我就用佢黎煲咗呢個湯
大家唔使驚會有鴨騷味
煲出黎D湯好清甜嫁！
冬瓜薏米煲水鴨湯
材料：水鴨1隻(洗淨切去頭和尾，再切為4大舊，然後出水)，
豬約20元(洗淨切件出水)，
冬瓜2斤(切大舊)，
生薏米2湯匙(洗淨)，
蓮子2湯匙(洗淨)，
陳皮1角(浸軟，刮囊)，
金華火腿少許唔加都可以)切粒飛水
製法：
水適量，凍水放陳皮，水滾後加入全部材料(冬瓜隨外)煲1小時
煲1時候後，落埋冬瓜繼續煲多1.5小時
即係共煲了2個半小時
OK！落鹽調味
飲得啦~
＊冬瓜記住遲D先放，就吾會攪到爛晒啦
＊可以的話加埋金華火腿，會更加好味嫁
蒜香鮮菇炒蘆筍(附食譜)
今日表小姐要出荃灣學琴
但係佢話唔想係出面食晚飯喎
咁唯有煮定D餸先出去喇~
今朝見D蘆筍好靚&我又好鍾意食喎
咁就煮咗碟鮮菇炒蘆筍
哈哈~我嘅至愛
好好味呀!
蒜香鮮菇炒蘆筍
材料：蘆筍5條(洗淨，批去底部硬皮，斜切段)，鮮冬菇5元(沖一沖切片)，瘦肉少許(可不用)切片，蒜頭切蓉(4粒)
調味：油，糖，麻油 少少生粉水(後加)
製法：滾水中加些鹽，放入蘆筍焯一焯，盛起
瘦肉加入普通醃肉料醃下後炒熟兜起
熱鑊落油，放蒜蓉爆'香，先落冬菇炒透，跟住放埋蘆筍大火炒，放調味兜勻
後，用生粉水埋獻，OK！食得
神茶系列~羅漢果雪梨潤肺湯(附食譜)
早前好朋友話我煲果D係神茶
咁即你話我係神婆姐
哈哈！諗諗下~整番個神茶系列都好喎
近期流感高峰期，好多人中招，徵狀大多數係氣管發炎，喉嚨痛，聲沙，痰多，咳嗽...
今日神婆有好介紹
就係呢個~羅漢果雪梨潤肺湯
哈哈~經臨床實驗，呢個湯係得嘅(我連續幫人煲咗2日，佢話好有效喎)
功效：清肺潤燥，化痰止咳；對感冒引起的喉痛聲沙, 失音, 喉嚨發炎有幫助
大家不彷試下~
羅漢果雪梨潤肺湯
材料：羅漢果1/4 個(壓碎)，南北杏2湯匙，雪梨 2 個(去心，留皮，切粒)，
蜜棗１粒，瘦肉15元(出水)
＊唔加瘦肉可用3粒無花果代替
製法：瘦肉與其他材料加水 2公升(約8碗)一齊用大火同煲，煲滾後改小火煲約2 小時，熄火飲得！
＊個人認為唔需要加鹽調味，因為羅漢果雪梨都有甜味，當甜湯味道唔錯嫁！
＊羅漢果份量唔可以多過1/4個，唔係就太甜，好難飲嫁！
香噴噴~更新版(附食譜)
藍爸爸放埋今日，明日又要返工啦~
兩日話咁快就放完
今日繼續做個稱職嘅老婆
煮番D藍爸爸鍾意食嘅嘢先
突然心血來潮，諗起荷葉元貝蒸雞
哈哈！就呢樣啦~
荷葉元貝蒸雞(附食譜)
雞肉有香噴噴嘅荷葉味
仲有元貝嘅鮮味
好好味呀~
荷葉元貝蒸雞
材料：乾荷葉2塊，雞1隻，細冬菇10隻，元貝數`粒，葱1條切段，薑2－3片
調味：油，糖，鹽，油，紹酒，生抽，老抽(少少調色)，生粉，少少水
製法：元貝用水浸大約1/2小時，然後連水蒸20分鐘，將一半元貝撕碎，一半留原整
冬菇浸軟去蒂，抹乾水後用少少糖，油 拌勻
雞切件加入調味，半份量嘅冬菇&撕碎嘅元貝醃30分鐘
荷葉洗淨放入滾水中拖一拖，然後抹乾水，將其中一塊剪開(1開2)，再剪去硬
嘅地方
原整荷葉放底，係荷葉中間位置放上剪開嘅兩塊荷葉，首先放原整元貝&一
半冬菇係底(見圖)，再放入雞件係面，然後將包好嘅荷葉雞放在深碟中蒸大約
30分鐘
蒸好後嘅荷葉雞會有汁留係深碟內，千期唔好倒咗佢，係食嘅時候將D汁加翻
熟，淋在雞面，ok，大功告成啦！
檸檬蒸烏頭
烏頭我成日都會買
因為佢地個個都鍾意食
今日我就整咗檸檬蒸烏頭
扁頭粉葛排骨湯
見D天氣咁潮濕，就煲咗呢個湯
好甜好好飲呀~
好滿足~西貢
4月18日 星期日
早幾日心情麻麻地~
不過好朋友黎同我飲完茶之後，開心番晒啦！
為咗要令呢個開心指數持續落去
今日叫咗大少陪我出街逛逛
諗咗一輪之後決定去西貢鬆一鬆
今日出街嘅時候天色有D暗，好似想落雨咁
好彩！天公造美，全程都無落到
感覺好舒服呀！
逛咗一輪，入咗去 Pepperonis Pizza & Cafe 醫肚
吓！waiter 講英文嘅~
哈哈！原來去西貢食嘢要 talk 得嫁
尼間餐廳好有趣嫁，就係每張枱有一杯臘筆，可以係鋪枱嘅大白紙上面畫畫畫，
早知帶埋表小姐黎啦~
哈哈~我緊係唔〝拾輸〞啦！
寫番幾隻字先~
Seafood Salad~yummy
蒜蓉青口~好得呀
招牌 pizza~冇嘜特別
apple juice
食完真係幾飽下~
出去繼續逛多陣
咦！尼間 Sai Kung Cafe & Bakery 點解咁多人排隊嘅
哈哈！估都估唔到呀
哦~係買菠蘿包嫁
D人話好出名 & 勁好食
賣6元1個
咁我又唔〝拾輸〞啦
我同大少每人試咗1個
嘩！嘜真係咁大個嫁
成隻手板咁大呀
大少試完話：第日唔好再買出面果D菠蘿包啦
呢個好唔同呀！
唔得啦！飽到頂上心口
都係走人啦~
唔係呀！果間 Mushroom Bakery 又咁多人嘅
原來入面賣果D全部係西式包黎架
但係價錢就好抵，全部幾蚊有交易
咁我見咁抵就買咗D番去聽日早餐食先
尼間餅店嘅店員都係講英文嫁
我今日講咗咁多句英文
忽然覺得自己勁咗呀！哈哈~
今日去西貢逛完，人都醒神咗呀
仲好滿足添！
模範主婦
4月16日 星期五
好朋友，其實我好想見到妳嫁~
有好多說話想同妳講
仲好想收到妳份手信
(哈哈！又係度傳情啦)
無奈...
唔知咩原因，尼兩日心情麻麻地
哈哈！唔理咁多，一於賴俾果個衰人嚇親
今日懶蟲又作怪啦
唔多想做，仲好眼瞓添
但係藍爸爸黎緊嘅星期六日都要返工
即係話佢要帶飯啦
唔煮唔得添
今次真真正正做個模範主婦啦~煮足7日
好攰呀~
放假仲要冇人陪~齊悶死我啦！
今日我煮咗尼D餸~
尼碟係節瓜本菇炆鴨掌
炆咗好大大碟
係藍爸爸&表小姐嘅至愛
尼碟係數字豬扒(味道似糖醋豬扒)
屋企只係得番黑豚豬扒咋
好大塊呀
大少&表小姐都好鍾意食
尼個係冬瓜咸蛋肉片湯
好耐無煲過啦！
放咗沖菜落去滚湯
好好飲呀！
