餃子兩食
星期六老爺唔使返工,佢就陪我食完早餐然後一齊去買餸,
我話:成日煮飯,難得放假真係唔想煮呀!
老爺話:咁不如出街食呀!
我話:但係又晤想出去食喎,食來食去都係個D嘢!
老爺話:咁煮粉食啦!
我話:都好啦!
咁我倆就行去買粉既地方,去到見有人包緊雲吞,我又心思思想包,老爺話:妳係咪想包呀!係就買餃子皮番去包囉!佢咁講,我緊係即刻買啦!我用咗6蚊買水餃皮,再去肉檔買咗10蚊半肥瘦免治豬肉,加咗D冬菇粒和1個椰菜,咁就整咗40隻餃子,20隻用煎既方法,大少至愛;另外20隻就整咗湯水餃,幾好食,唔錯!
材料:
椰菜1個(約斤半),餃子皮半斤多少少,半肥瘦免治豬肉10元,冬菇6隻(浸軟切粒),薑蓉約2茶匙,
免治豬肉醃料:
生抽,糖,鹽,油,生粉,水
調味:
鹽,麻油,雞粉,生抽,胡椒粉,生粉
製法:
椰菜切絲後放入滚水中煮至軟身,然後切碎,去掉水份(揸到手都軟呀)
免治豬肉拌入冬菇粒,然後加醃料醃一陣
椰菜,薑蓉和免治豬肉加埋調味拌勻,備用
用1塊餃子皮包1份餡,
包好後可選擇煎成香口餃子,
或濕濕地既放湯餃子
兩者都咁好食嫁!
沒有留言:
張貼留言