錢作怪

                                         錢作怪

     好多日都無寫blog就因為錢作怪羅！今日叉得閒繼續啦！真係返學都唔見有咁積極呀

        自從舊年讀咗個家務助理課程之後，聯工盟就介紹工作比我，當時讀既心態係想去讀，學下D技巧返屋企做清潔容易D，無諗過出去幫人做，但係D同學就話有人出糧比你兼比間屋你實習幾好呀！好啦！好啦！咁我就選咗份只係逢星期六上午9時—下午1時返既工，做下做下又差唔多一年啦！好多謝李太既包容，客氣，比咗我好大既自由度。

       係而加既環境又話金融海嘯又話裁員，個個部驚飯碗不保，你地話啦會唔會嫌錢多呀！所以一有人找我兼時間OK，我多數應成

       唔知點解自從做咗第一份兼職開始，第二份、第三份、第四份......陸陸續續出現，有好多我都推咗啦！人就得1個，工就有咁多份，點搞呀

     通常返工我只會做早上，晚上既我唔會接，但係星期五晚，我就破例做咗１單，因為我體諒佢既難處，同埋我曾經去幫佢做過兩次，大家相處既氣氛好好，所以無計啦！個晚要落上水火車站隔鄰既屋苑做，6：00pm 做到10：00pm，不過末夠10點就走得，我打返屋企話走得，老爺同大少話係車站等我，仲話陪我去食宵夜添呀！都幾開心嫁！大少仲話，妳做咗咁耐要叫個鐵板餐食下先得啦！我話，吓！你估我係你呀！我唔鍾意食咁多肉嫁不過係言談中都知佢好關心同埋鍚我，大少算你有D良心啦！