南乳豆卜炆雞
各位blog友，你地一定會覺得藍媽媽好鍾意炆餸，係架！因為我唔係時刻都得閒，有時要返工，有時又要帶住表小姐周圍去，有時又要就大少學日文既時間，總括黎講就係煩啦！
但係日日出街食，唔得加嗎！咁炆餸就最好啦！得閒炆定到食時再番熱就得，而且仲入味添呀！
好似尼個餸就係我今朝7點時炆既，到晏晝放工先食，好入味呀
材料：雞半隻(洗淨切件)，豆卜3元(洗淨放入滾水中飛水，兜起壓去水份)，西蘭花1棵(洗淨切成小花)，南乳約1湯匙(加1湯匙紹酒調勻)，薑1片，蒜頭1粒(切蓉)，葱頭1粒(拍扁)
製法：雞加生抽，糖，鹽，生粉，油，少少水拌勻，醃一陣
調味：生抽，老抽(少少調色)，糖，蠔油
熱鑊落油，先爆香蒜蓉，薑片，葱頭，放入雞件爆至兩面金黄色，落南乳兜勻，再落埋豆卜和調味，加入適量既水，蓋住鑊蓋用中小火炆至豆卜入味和汁濃，試味落盬，OK！熄火上碟
係炆雞既同時，可用另一隻鍋煲滚少少水，加入鹽，糖，油 焯熟西蘭花，然後〝不〞上碟
沒有留言:
張貼留言