煎蠔餅

                                煎蠔餅

 

       大少叫咗我整尼個餸好耐啦！不過一路都當耳邊風，無佢咁好氣，尋日晤使返工又係街市見到D蠔仔好新鮮，

                                       

 

        咁就做下廿四孝媽咪，整咗尼個餸囉！

材料：蠔仔10元，鴨蛋2隻，番薯粉4—5湯匙，芫茜葱大量(個人喜歡)切碎

調味：盬，糖，魚露，胡椒粉

製法：蠔仔洗淨後隔去水分

           蛋打勻，加入番薯粉，調味料拌勻，再加芫茜葱碎同埋蠔仔拌勻

           熱鑊落油(多DD)分數次將蠔粉放入熱油中，用中小火煎至兩面金黄色，OK！食得

大豐收

                        大豐收

 

        今日收到藍姨媽係瑞典寄黎既掛號信，裏面夾住3張100蚊既美金，不過唔係比我嫁，全部都係比大少同埋表少姐既暑假玩樂費，佢地就肥仔啦！成日都有收獲，希望佢地識做啦！

       藍姨媽大過我10幾歲嫁，我BB時都係多得佢湊我咋，佢係我7歲時就結咗婚，再過咗幾年佢就去咗瑞典定居啦！久唔久就番下黎，每隔10日8日就通1次電話，每次一講就一兩個鐘閒閒地，你地話係咪好勁呢佢話我細個時係佢凑大，所以對我最有感情，成日都諗起我細個D嘢喎，相反我就無心肝啦！

      真係好想過去玩呀！我細佬就係挪威自己揸車過咗去玩兼買野，唔得，我明年都要去！

 

漢陽苑

                    漢陽苑

       前晚大少話好想去食韓國燒烤，不如聽日去食呀！我咁順得人，唔係咁過份既都唔會托手踭啦！其實我唔鍾意食咁多肉，今次又陪太子讀書啦！

       尋日朝記得報紙有張9折優惠券，我尼個精明消費者緊係唔放過啦，慳得1蚊得1蚊呀嗎

       11點三口子搭271出佐敦，去咗佢係佐敦薈個間分店度食，裝修好乾淨企理，食物無嘜特別，不過就補充得好快，無人迫人既感覺，仲有佢四周都掛有大電視，一邊燒一邊食好悠閒呀！

       午市燒烤自助餐(11：00am — 3：30pm)

       價錢(成人)$68  (小童)$58  星期六、日每位加$10   

    

        其實除咗燒烤食物，仲有壽司，炸茄子，魚蛋，燒賣，炒大豆芽，炒菜，三文魚，魚皮，冬陰公湯，人参煲雞湯，豬腳薑，碗仔〝次〞，反沙芋，韮菜煎蛋，豆腐花，涼粉，泰式杧果糯米，泰式甜品，雪糕，生果……

     我好鍾意食豬腳薑嫁，今次食番夠本啦！好食過酒樓好多，不過佢好特別，係帶咸嫁

   

       

     

瑞士雞亦

                                          瑞士雞亦

 

      雞亦我好少買，因為D人成日話好高激素，尤其是雞亦同埋雞頸，為咗表少姐著想，咁就唔食囉！

     其實唔理佢係咪高激素，大家都唔好成日食呀，唔係D血脂就超晒標啦！

     好耐無食過雞全亦，有DD掛住佢呀，早幾日就買咗6隻(9元磅，買咗16元)，用咗瑞士汁黎浸，既方便又好食

 材料：雞全亦6隻，瑞士汁，水(瑞士汁和水比例係2：1)，薑1片，葱1條(去頭尾)

 製法： 首先將雞翼先解凍,加入薑葱落滾水中，再放入雞亦飛水，然後取出過冷河

                  將瑞士汁和水煮滾, 放雞翼後待汁再滾起後 熄火，到食時再煮滾就食得 ，好嘢有得食       

 

          

南乳豆卜炆雞

             南乳豆卜炆雞

 

       各位blog友，你地一定會覺得藍媽媽好鍾意炆餸，係架！因為我唔係時刻都得閒，有時要返工，有時又要帶住表小姐周圍去，有時又要就大少學日文既時間，總括黎講就係煩啦！

但係日日出街食，唔得加嗎！咁炆餸就最好啦！得閒炆定到食時再番熱就得，而且仲入味添呀！

        好似尼個餸就係我今朝7點時炆既，到晏晝放工先食，好入味呀 

 材料：雞半隻(洗淨切件)，豆卜3元(洗淨放入滾水中飛水，兜起壓去水份)，西蘭花1棵(洗淨切成小花)，南乳約1湯匙(加1湯匙紹酒調勻)，薑1片，蒜頭1粒(切蓉)，葱頭1粒(拍扁) 

 製法：雞加生抽，糖，鹽，生粉，油，少少水拌勻，醃一陣

 調味：生抽，老抽(少少調色)，糖，蠔油

        熱鑊落油，先爆香蒜蓉，薑片，葱頭，放入雞件爆至兩面金黄色，落南乳兜勻，再落埋豆卜和調味，加入適量既水，蓋住鑊蓋用中小火炆至豆卜入味和汁濃，試味落盬，OK！熄火上碟

       係炆雞既同時，可用另一隻鍋煲滚少少水，加入鹽，糖，油 焯熟西蘭花，然後〝不〞上碟 

         

大暑冬瓜湯

                    大暑冬瓜湯

        好多人習慣係大暑會買1包去濕料返屋企煲冬瓜湯，我記得好似係煲過１次咋，因為大少唔鍾意個種味呀！佢話似涼茶喎，哈哈～其實我都唔鐘意呀

       今日我淨係用咗生薏米同埋扁豆去煲，味道好飲好多呀

  

 材料：冬瓜2斤連荷葉1角(洗淨連皮切大舊)，扁豆3大湯匙(洗淨)，生薏米2大湯匙洗淨)，排骨25元(出水過冷河)，蜜棗4粒

   

   

   

  製法：水適量煲滾，將全部材料放入，待水再滾起，轉小火煲2又1/2小時，落盬調味，熄火飲得！

      

洋葱炒豬頸肉

             洋葱炒豬頸肉

        我係吉X島超市買咗1pack豬頸肉18元，同陳太對分，今日我整咗尼個餸兩次啦！

真係煮到爛熟

 

材料：豬頸肉(洗淨後切條)加醃料醃15分鐘，洋葱1個(去衣洗淨切絲)，蒜頭1粒(切蓉)

醃料：生抽，糖，鹽，油，生粉，少少水

製法：熱鑊落油，先爆香蒜蓉，再落豬頸肉炒透，倒入洋葱兜勻，加少少水，糖，蠔油，老抽(調色)煮至洋葱略淋，落盬調味，熄火上碟，食得！

梅菜炆豬肉

                     梅菜炆豬肉

 尼排個人比較懶呀！嘜都唔想〝旭〞，煮飯更加唔使講啦，哈哈～

但係點都要煮嫁，咁就的起心肝係晏晝炆定個梅菜豬肉，等今晚番熱黎食，大家唔好以為炆餸一定好麻煩，其實好容易嫁咋，只係時間要長D

             

材料：梅菜6両，腩肉8両，薑2片，蒜頭2粒(切蓉)，葱1條(切段)，片糖約1/4片

製法：梅菜洗淨搾乾水切碎

             腩肉出水後切件再加少少老抽調色

             熱鑊落油，先爆蒜蓉、薑片，再放豬肉爆透，跟住落梅菜，贊酒，加入清水、老抽、生抽、片糖，等水滚後轉慢火，加鑊蓋炆至肉淋同埋入味，再放埋葱段，熄火，上碟食得

 

物非所值

                     物非所值

       今晚無煮飯，可能平日煮到無停手，放假就想停產比自己休息下，其實唔使解釋，即係懶囉

       一家三口行來行去都唔知食嘜好，最後走咗入去太興，每人揀咗一款套餐，大家一齊食，老爺叫咗咕嚕肉配白飯，飲熱奶茶，我就叫泰式海鮮三寶配白飯，飲冰鎮奶茶，大少就叫咗八寶飯配油菜，飲湯，合共174元。

      比大家睇下D相先

                                              咕嚕肉

  

                                    泰式海鮮三寶(睇落就掂)

   

                                       八寶飯

  

                冰鎮奶茶

  

      平日係太興食D餸都OK嫁，不過今日我叫個泰式海鮮三寶就好唔掂，裏面有兩隻蝦，有D魷魚(又少又硬，根本就咬唔到)仲有魚柳(面頭D粉好似糊仔)，仲有少到不可再少既蟹柳，得半條咋，不過有多到不可再多既配料，個厨煮得仲差過我，點賣60元呀，真係物非所值。

 

      以我既性格，我緊係有 同佢地反映啦，不過佢地聽完就算，無人回覆我姐，真係 too bad

 

Bonus

                     Bonus

        近排比較忙，所以無嘜時間拜訪各位blog友，真係唔好意思，請大家多多見諒！

        早幾日伍太打比我，問我今晚有無時間幫佢打掃，我有時間通常都唔會say NO，緊係接啦

        下午5點帶咗表小姐去操水(7點叫咗佢爸爸去接)鬆人，咁就行去太和火車站搭車去上水，去到見仲有時間，咪走咗去吉野家食咗個牛肉飯先上去囉，做咗四個鐘，10點就走得，好嘢！又袋袋平安啦

          伍太係大陸返工，佢公司係造袋嫁，大、小、平、貴、連名牌都有，佢上次已經比咗好多袋比表小姐，今日佢又送咗個散子包比我，額外獎賞呀！仲好靚添，大家睇下

             

 

     唔知點解我第一眼見到個散子包，就諗起HoneyB

     

老黄瓜扁豆排骨湯

             老黄瓜扁豆排骨湯

   尼排飲得凍嘢多，係時候煲D去濕湯飲下啦！

  

材料；老黄瓜1條(去籽切大舊)，紅蘿蔔1絛(去皮切件)，扁豆2元(洗淨)，陳皮1角(浸軟刮囊，排骨頭25元(先出水)，蜜棗3粒(洗淨)

    

  

 製法：煲注入適量水，放陳皮然後開火，水滚後放入全部材料，再滾起後轉小火煲2又1/2小時，落鹽調味，熄火飲得

    

蠔汁節瓜炆鵝掌

                       蠔汁節瓜炆鵝掌

       今朝唔使過去幫陳太煮飯，就陪老爺去喋喋不休食埋早餐先去買餸，我通常會去大埔墟買餸，貪個邊D嘢夠新鮮夠齊全，缺點就係遠，有時買得多就搭車返屋企，其實計落都唔化算嫁

        係大埔墟新街市梁X記，見佢剛剛開檔攞咗D鵝掌出黎，又唔抵得買咗5隻，$17.4比鴨掌貴好多呀，不過勝在夠大隻，今日就用佢黎炆節瓜，表小姐至愛(只限鵝掌)哈哈～食肉獸

               

   材料：節瓜2條(1條切為8件)，鵝掌5隻(１分為2)，蒜頭2粒(切蓉)，薑1片

   調味：蠔油，糖，老抽，鹽  (後下)  

   製法：鵝掌先加薑紹酒出水，可用小火煮耐少少(約15分鐘)，兜起用水沖淨瀝乾

               熱鑊落油先爆薑片蒜蓉，再落節瓜炒一炒，落鵝掌炒勻，加水至料位置，再加入調味料，用小火蓋住鑊蓋炆至瓜〝淋〞汁濃，如汁太多，轉為中大火煮至汁濃，落鹽調味，OK熄火，上碟食得！

麻婆豆腐

                      麻婆豆腐

     日日煮到無停手，有時真係唔知食嘜好，又唔想成日食D一糢一樣既餸，你地話係咪繁呀今日又是是但但，無嘜新意，大家粗粗地食住先啦

       今日唔得閒，寫住1個餸先，明天繼續

       麻婆豆腐亞仔鐘意食，有益又經濟，超值

  

材料：滑豆腐1磚，免冶豬肉5元，葱1條切粒，蒜頭2粒切蓉

醃料：生抽，糖，盬，油，生粉，水少許

調味科：豆板醬1湯匙(先爆)，糖，鹽，老抽少少(調色)，麻油，水適量，

製法：豆腐切粒用滚水焯一焯，兜起瀝乾水

            免治豬肉加入醃料醃一陣

            熱鑊落油先爆蒜蓉和豆板醬，放入豬肉炒香，再將豆腐回鑊，加入調味拌勻煮滚，加少許生粉水埋獻，上碟灑下葱粒，食得