鴛鴦肉絲菇菇炒烏冬
剛剛整咗呢個烏冬比亞仔食完之後返學，真係唔知算係早餐定係午餐，10：30am叫我陪佢食，點食呀？我8點幾先食咗嘢炸！
亞仔話我炒得好食過樓下個間餐廳呀！多謝哂佢咁慷慨(日行一善)，
尋日係樓下買咗一盒炒河，一盒炒鳥冬返屋企食，埋單58元(好貴呀！)今日我用28元就整咗2大碟出黎，經濟又抵食！
《 鴛鴦肉絲》—即係用咗兩種肉，豬肉切絲和煙肉切絲
《菇菇》—即係用咗兩種菇，冬菇和金菇
材料：烏冬4包，煙肉半包，梅頭瘦肉10元，金菇1包，冬菇4隻，乾葱頭2粒(切片)，
葱1條(切段)
調味料：清水約1/4杯，雞粉1茶匙，蠔油1湯匙，盬少許，老抽1荼匙
製法：1.瘦肉洗淨後抹乾水，然後切絲，加入生抽，糖，盬，生粉，油，水，醃10分鐘以上
2.煙肉切絲
３.冬菇浸軟，揸乾水切絲；金菇去頭沖水備用
4.鳥冬用滾水浸至鬆開，取起隔去水分
5.熱鑊落油，落瘦肉炒熟，兜起
6.鑊再落油，落煙肉爆香，再落冬菇爆至有香味，就落埋金菇(記住用大火炒，唔係就會出水)炒至金菇軟身就兜起
7.鑊落多少少油，放乾葱片爆香，跟住落調味料，調味煮滾後倒入鳥冬炒透，最後加埋所有材料，炒至乾身和均勻，就放埋葱段，熄火上碟，完成！
其實妳個乖仔不是日行一善，衹係口甜舌滑，不過佢都係真心嘅！ 做亞媽真係偉大，一日三餐照顧周到，好幸福
回覆刪除[版主回覆04/21/2009 17:44:00]咁又無三餐,最多都係二餐,早餐自理啦!
你買兩盒外賣 $58 、平過我地呢邊啊
回覆刪除[版主回覆07/09/2009 20:46:00]大埔區太多食肆啦！競爭太大，所以咪經濟D囉，每逢假日有好多城市人會入黎行下，食下嘢，妳有時間都黎行下啦，包妳滿意
我有去過一處、好似叫做大埔墟熟食市場、樓下是街市、樓上有好多種類的美食、有D仲係好出名添 我地成班人好八掛、睇下D人食乜、有班踢完波的年輕人正在午餐、話好抵食＄25連凍飲、款式又多
回覆刪除[版主回覆07/09/2009 22:02:00]嘩！太陽媽媽好叻呀！ 連大埔墟熟食市場妳都識，咁第日就叫埋我去啦！