鮮腐竹蒸鳥頭
平日整鳥頭都淨係用檸檬蒜頭豆鼓來蒸，今日特別D，加咗少少鮮腐竹，蒸出來腐竹入晒味，幾好食！
材料：鳥頭1條(蒸時魚鱗保留，可令肉滑D)，鮮檸檬半個(切片)，鮮腐竹少許(切段)，蒜頭(切蓉)豆鼓適量，葱1條(切段)
製法：烏頭放碟上，魚旁放腐竹，在魚上放蒜蓉豆鼓和檸檬片，然後放入滾水中隔水蒸10—12分鐘，取出倒去多餘魚汁，放上葱段後再淋上熟油豉油，OK！食得！
2009年4月29日 星期三
自家製漢堡扒
自家製漢堡扒
呢排成日食煎餅，繼蘿蔔餅後再黎藕餅，到今日就整咗漢堡扒。呢個餸都好多個月冇整，水準都能保持，但係就多咗老抽，所次顏色比較深，下次要緊記先得啦！
睇下張相係咪好深色呀！真失敗！
想睇番張靚D既相和製法—請click入舊有食譜
http://hk.myblog.yahoo.com/mamasurewin/article?mid=65
2009年4月28日 星期二
香口藕餅
香口藕餅
今日亞仔食埋中午飯先至出門口，我就整咗尼個藕餅比佢試，佢話幾好食喎！裏面一絲絲係嘜嘢黎嫁？我冇話佢知呀(因為佢由細到大都唔食蓮藕，費事佢唔食)，哈哈！好嘢！
食晒後我話佢知係藕餅，佢話有D似芋頭味喎！同埋話味道和口感都唔錯。我以後都要想下辦法，用佢平日討厭既食物整到合佢口味的菜式先得。
＊今次整到細細件， 一口一吃，外面脆脆的，裏面軟軟的，間中又會食到咸蛋黄的甘香，好好味呀！
今次既份量可以整到約25件藕餅
材料：蓮藕2截，免治豬肉10元，咸蛋黄1隻(切碎)，臘腸1絛或煙肉2片(切細粒)，芫茜1棵(切碎)
調味料：盬，糖，胡椒粉，生粉2湯匙
製法：蓮藕刨絲後，揸乾水分，加入所有材料調味料拌勻
＊拌勻藕餅的質感，有D似芋蓉
用湯匙來整成1個個小圓球，大小隨意，煎之前撲上生粉
熱鑊落油，用慢火煎至兩面金黄色(要熟)，熄火上碟，食得！
2009年4月26日 星期日
惹味三文魚頭年糕煲
惹味三文魚頭年糕煲
早幾日老佛爺比咗一包年糕我，話係伯婆奶奶比佢，仲同佢講D年糕要點整，同埋點好食，不過老佛爺唔理三七二十一比咗我，叫我整黎食，佢費事繁喎！
我見今日整三文魚頭咪放D落去囉！點知亞仔話年糕同冬菇先係主角，三文魚頭變咗做配角啦！真係可憐！
材料：三文魚頭1個，冬菇8隻，年糕約有二十片，乾葱頭2粒(拍扁)，薑1片，葱1條(切段)，豆瓣醬，
製法：冬菇浸軟去蒂揸乾水，用糖和麻油醃住
三文魚頭洗淨抹乾切件加入生抽，糖，胡椒粉，麻油，生粉，水，醃15分鐘以上
年糕用水煮至軟身，備用
熱鑊落油，先爆香薑片，然後把魚頭撲上生粉，放入鑊煎至兩面金黄色，剷起
熱鑊落油，爆香 乾葱頭，放入冬菇爆透，落豆瓣醬爆一爆，放埋魚頭，年糕，糖，鹽，雞粉，蠔油，老抽，水，炆至入味，落埋葱段兜勻，熄火食得！
饅頭DIY
饅頭DIY
製成品：
饅頭是一種非常普通的食物，但係是點整呢？容唔容易呢？有無嘜嘢竅門呢？一連串既問題不停擁現出來。要解問呢D疑問，唯一可行的方法，就係自已親身體驗一下。
有人會話攪咁多嘢做嘜呀！又唔知成唔成功，不如買好過啦！但係自已DIY既出品，係唔同既！同埋係整嘢食的過程有好多樂趣，係外人唔會明的既！
今次體驗得出既結果係：越簡單既食物越難做得好。
麵團材料：麵粉2又1/2杯(今次用咗大白菜牌中低根麵粉)，泡打粉1/2菜匙，酵母粉2茶匙，糖2湯匙，鹽1/4茶匙，温水4湯匙，冰水1/2杯多少少，菜油1菜匙
1.酵母粉加入１茶匙糖和温水拌勻，備用
2.麵粉＋糖＋盬＋泡打粉先混合後篩勻
3.已攪勻的酵母水倒入麵粉中
4.將麵團揉勻後，然後放在盆中蓋上保鮮紙
5.再放上一條濕毛巾醒發1小時(比原先大咗2倍)
6.取出用麵桿擠壓出氣泡，然後揉至光滑，再切成約15份
7.每份揉圓後再醒多20分鐘，蓋上保鮮紙
8.水先煲滚後放入蒸籠，排入小麵團，用小火蒸5分鐘，跟住用大火蒸多8－10分鐘，熄火食得！
2009年4月25日 星期六
2009年4月23日 星期四
椰香咖哩牛肋條
椰香咖哩牛肋條
《足四位享用》
今日下午帶咗表小姐去音樂中心學柳琴，所以係上午11點就開始炆尼個餸，等自己煮晚飯既時候冇咁趕。但最美中不足既係，整既時候先知雪櫃冇晒洋葱，冇辦法啦！照整
材料：急凍牛肋絛約1斤，薯仔2個，紅蘿蔔半絛，洋葱1個，薑2片，蒜頭2粒(切蓉)，乾葱頭1粒(拍扁)，咖哩粉2茶匙，花奶(細)1/3罐，椰漿(細)1罐，清水2杯至2又1/2杯
調味料：雞粉1茶匙，冰糖約1湯匙，盬1又1/2菜匙
製法：1.牛肋絛洗淨後抹乾水
2. 薯仔，紅蘿蔔洗淨後去皮切角
3. 熱鑊落油，放入牛肋絛爆至兩面金黄色(可以去〝蘇〞味)，取出過泠河
4.熱鑊落油，放入薯仔爆透，剷起備用
5. 熱鑊落油，放入薑，蒜蓉，乾葱頭，爆香，跟住加入咖哩粉，薯仔，紅蘿蔔，洋葱，調味料和清水，等水滾起就轉慢火炆約45分鐘，熄火焗30分鐘，再開火炆約15分鐘，又再熄火，等到吃既時候開火煮滚，再加埋花奶和椰漿(微滚就熄火)，上碟食得！
2009年4月21日 星期二
羅漢果金銀菜湯
羅漢果金銀菜湯
尋日係雪櫃找到1包早前買既金華火腿骨，應該係10蚊，當時見佢咁抵，咪買咗啦！點知就咁就比我遺忘咗，真係可憐啦！
今次D湯料太多，所以煲湯D水亦要增加，(可以夠四個人飲2日，每人2碗計)
材料：菜乾1両半至2両，大白菜半斤，羅漢果1/4角(只要外殼，唔要入面D肉)，紅蘿蔔1絛，馬蹄半斤，南北杏2湯匙，蜜棗3粒，果皮1角，金華火腿骨1包，豬利1絛(可用排骨或瘦肉代替)
製法：1.菜乾浸軟，清洗乾淨後，揸乾水分，再切段
2.大白菜洗淨，隔去水分備用；紅蘿蔔去皮切角
3.果皮浸軟去囊；馬蹄去皮再切半
4.南北杏，蜜棗洗淨
5.豬利，金華火腿骨出水
6.果皮隨凍水煲滚，再放入其他材料(除大白菜外)，待水滾起後轉小火煲
2又1/2小時，再放埋大白菜煲30分鐘，落盬調味，熄火飲得！
p.s 煲湯唔好超過3小時，會有毒素產生
香煎釀節瓜
香煎釀節瓜
有時用同樣的食材，但改變慣常的煮法，出來的感覺截然不同，又有新鮮感！
今次我用了免治豬肉，小元貝，節瓜做出尼個餸，味道比小元貝煮節瓜好味好多！
材料：節瓜1條(今次用既係長身節瓜，較短身的好食)，小元貝2湯匙，免治豬肉約
6元 ，芫荽1棵，生粉適量
調味料：水，雞粉，蠔油，糖，盬(煮好試味後才落)，老抽(少少調色)
製法：1.小元貝用水浸透，然後隔去水分，絲；芫荽洗淨切碎
2.免治豬肉加入生抽，糖，盬，麻油，生粉，少少水拌勻
3.節瓜去皮後切成約1‧5cm厚
4.免治豬肉加入小元貝絲拌勻
5.節瓜去中心部份，再係圈周圍撲上生粉，再釀入豬肉，再在節瓜底和面撲上生粉
6.熱鑊落油，放入節瓜，煎至兩面金黃色，跟住加入調味料，加鑊蓋用小火煮大約10分鐘(節瓜淋)，揭開蓋落埋芫荽碎拌勻，熄火上碟，完成！
2009年4月19日 星期日
鴛鴦肉絲菇菇炒烏冬
鴛鴦肉絲菇菇炒烏冬
剛剛整咗呢個烏冬比亞仔食完之後返學，真係唔知算係早餐定係午餐，10：30am叫我陪佢食，點食呀？我8點幾先食咗嘢炸！
亞仔話我炒得好食過樓下個間餐廳呀！多謝哂佢咁慷慨(日行一善)，
尋日係樓下買咗一盒炒河，一盒炒鳥冬返屋企食，埋單58元(好貴呀！)今日我用28元就整咗2大碟出黎，經濟又抵食！
《 鴛鴦肉絲》—即係用咗兩種肉，豬肉切絲和煙肉切絲
《菇菇》—即係用咗兩種菇，冬菇和金菇
材料：烏冬4包，煙肉半包，梅頭瘦肉10元，金菇1包，冬菇4隻，乾葱頭2粒(切片)，
葱1條(切段)
調味料：清水約1/4杯，雞粉1茶匙，蠔油1湯匙，盬少許，老抽1荼匙
製法：1.瘦肉洗淨後抹乾水，然後切絲，加入生抽，糖，盬，生粉，油，水，醃10分鐘以上
2.煙肉切絲
３.冬菇浸軟，揸乾水切絲；金菇去頭沖水備用
4.鳥冬用滾水浸至鬆開，取起隔去水分
5.熱鑊落油，落瘦肉炒熟，兜起
6.鑊再落油，落煙肉爆香，再落冬菇爆至有香味，就落埋金菇(記住用大火炒，唔係就會出水)炒至金菇軟身就兜起
7.鑊落多少少油，放乾葱片爆香，跟住落調味料，調味煮滾後倒入鳥冬炒透，最後加埋所有材料，炒至乾身和均勻，就放埋葱段，熄火上碟，完成！
南瓜炆排骨
南瓜炆排骨
呢個餸都隔咗一排無煮，唔係因為唔好食，只因為藍血人(仔仔)唔鍾意食南瓜，咪唔煮囉，。有時覺得父母為子女付出好多好多，又不問回報，真係好偉大！但又有幾多個子女調轉幫父母想想，以父母既意願行先呀！
想知點整，可參考舊有食譜
http://hk.myblog.yahoo.com/mamasurewin/article?mid=102
2009年4月17日 星期五
豬肝娃娃菜
豬肝娃娃菜
經濟小菜 10蚊雞
呢個餸其實可以用自己喜歡既菜來做墊底,我覺得豬肝先至係呢個餸既靈魂,整得好食,包你食過返尋味!
材料:豬肝約5元 ,娃娃菜2包5元 ,蒜頭2粒(切蓉) ,薑1片
調味:水(至少要有半杯) ,蠔油 (多些),糖 ,生抽 ,(顏色想深些 ,可加少少老抽)
製法:1.豬肝洗淨後切薄片 ,然後加入蒜蓉 ,生抽 ,紹酒 ,糖 ,盬 ,油 ,生粉 ,少少水 ,醃15分鐘
2.娃娃菜洗淨切短
3.水適量煲滚 ,在水中加少少油 ,糖 ,雞粉 ,薑片,再放入菜 ,焯至軟身 ,盛起隔去水分
4,熱鑊落油(多少少) ,然後放入豬肝(用大火)爆炒至轉色 ,再加入調味料 ,兜勻後熄火 ,再將豬肝淋在菜面,完成 ,食得!
#汁多些好味D ,仲有豬肝應該帶少少甜
#記住要用大火爆炒豬肝
2009年4月15日 星期三
香煎蘿蔔餅
香煎蘿蔔餅
《份量可整成14個小圓餅》
近日見到街市的白蘿蔔依然好覩，每斤價錢只不過2元5角,整呢個餸都只係10蚊左右，經濟又好食
＊整蘿蔔餅既感覺有點像整緊蘿蔔糕，如果屋企有臘腸我會加落去
在網上都有人教整蘿蔔餅，但每個人都有佢獨有的風格，今次我整的方法大家可以用來參考一下
材料:白蘿蔔1條(約1斤)，免治豬肉約3-4両，蝦米2湯匙，冬菇5隻，芫荽1棵(切碎)，葱1
條(切粒)
調味料:胡椒粉，糖，盬，麻油，生粉約3湯匙(多少視乎水分)
製法:1.免治豬肉加入糖，鹽，生抽，麻油，生粉，少少水，醃10分鐘以上
2.蝦米洗淨切蓉，冬菇浸軟切粒，
3..蘿蔔去皮刨粗絲,加入1茶匙盬醃5分鐘(令蘿蔔出水)，揸乾水分，然後拌入免
治豬肉，蝦米，冬菇，芫荽，葱粒和調味料(全部拌勻)
＊我會先用少少油爆香冬菇，蝦米和葱粒，再加少少生抽拌勻，先至放入蘿蔔中
4.所有材料拌勻後，整成一個個小圓球(約2湯匙1個)
5.如果覺得太濕，可以先放入雪櫃(冰格)雪15分鍾，取出後在小圓球表面撲些生粉
6.熱鑊落油(多少少)，用小火煎至底部金黃色，然後反轉另一面，壓扁再煎成金
黄色(要熟)，熄火上碟，OK！
2009年4月14日 星期二
咸酸菜煮門鱔(二)
咸酸菜煮門鱔(二)
呢個餸我以前煮過,煮法可參考舊有食譜
http://hk.myblog.yahoo.com/mamasurewin/article?mid=164
今次買既係客家人自家製的咸酸菜,我白已鍾意食葉,咪叫佢比多D葉我囉!好好食呀!
仲有今次有落辣椒,更加好味!
2009年4月13日 星期一
栗子冬菇炆雞
栗子冬菇炆雞
材料
雞 1隻
栗子十多粒
冬菇8隻
蒜頭(切蓉)2粒
薑1片
蔥一條(切段)
醃雞料:
生抽,紹酒,糖,鹽,麻油少量,生粉,水
製法:
1. 栗子放入滾水, 煮大約10分鐘, 取出去衣
2雞洗淨切件,醃30分鐘以上
3, 冬菇浸軟,去蒂, 大隻就一開為二, 然後加少少糖同麻油醃一陣
4. 熱鑊落油, 落冬菇爆到有香味, "不"起
5. 再係鑊度加少少油, 放入薑片同蒜蓉, 爆香, 落雞件爆至雞件微黃
6. 加入冬菇同埋栗子, 拌勻,然後 贊酒, 加入清水約一杯半, 再加少少糖,生抽, 雞粉,蠔油, 用中大火蓋回鑊蓋，等水滾起後炆十分鐘, 熄火不要揭蓋，焗大約十分鐘, 之後再開火, 唔好揭蓋
7. 炆約五分鐘, 落鹽,, 少少老抽(調色)，試味, 如果汁太多就加少少生粉水, 加入蔥段, 拌勻, 熄火上碟, 食得
2009年4月12日 星期日
逍遙遊‧香港篇之元朗B仔涼粉
逍遙遊‧香港篇之B仔涼粉
飲完下午茶就去B仔涼粉食甜品，今次我地去咗又新街分店個間
去到見到有好多人食呀！對面街既甜品店就拍鳥蠅，真係同人唔同命
坐低就叫嘢食，又係食緊先記得影相(太心急)
糖不甩有8粒嫁
呢碟麻辣雞翼尖真係可以做到《骨淋入味肉唔爛》，而且賣10元
真抵食！
其他甜品就（不外如是），其實同出面甜品店差不多，但價錢又比出面貴
食飽飽就走人，在元朗逛咗一陣，試食埋恒香即製蛋卷就搭車返歸
今汶既行程幾滿意，但下次再去濕地公園我會留耐D，仲有就係記得帶望遠鏡(觀鳥必備)
完
訂閱：
文章 (Atom)